Programi i studios tonë bazohet në disa drejtime duke synuar një zhvillim të brendshëm multidimensional me teknika që bëjnë pastrimin e trupit, mendjes dhe emocioneve nga bllokimet energjitike të cilat ndodhin në nivele të ndryshme për secilin nga ne. Kjo hap rrugën për rrjedhjen natyrale të energjisë. Nëse nuk pastrohen emocionet dhe mendimet e shtypura njeriu mund të imagjinojë por nuk mund të ndjejë realisht fuqinë dhe energjitë e tij. Të gjitha këto teknika ju japin fragmente dhe ju filloni të ndjeni momente ku energji të reja fillojnë të ndërtojnë dhe kompletojnë njëra-tjetrën. Teknikat e Oshos, Gurdjieff, Sufiste, Tibetane, Shaman, Vigyan Bhairav Tantra, Tao etj ndërtojnë një model të plotë të njeriut dhe lidhin në mënyrë harmonike botën e brendshme me atë të jashtme.

Disa teknika, janë për të humbur veten, duke u dorëzuar te Zoti, me lutje, me vallëzim, me muzikë, të dehur prej tingujve dhe disa të tjera janë duke kujtuar veten, të fokusuar vazhdimisht në qenien tuaj në cdo moment të ditës. Qi gong dhe joga ju kthejnë në qendër te trupi, punojnë me miliona nerva dhe i rikthejnë në jetë, duke bërë të mundur që energjia të rrjedhë në harmoni. Studio jonë (Osho Vizion) përdor teknika të ndryshme meditimi që kanë metodologjinë perëndimore të kombinuar me intuitën e lindjes, e mbledhin pastaj e çlirojnë energjinë që të rrjedhë në rrugët e saj natyrale. Teknikat janë mjete dhe në momentin që ju e keni këtë energji ajo mund të transformohet dhe lulëzojë në nivele më të larta. Në këtë mënyrë mund të keni vizionin e dy ekstremeve dhe ti balanconi ato në mes duke krijuar një njeri, as ekspresiv, as represiv, por thjesht në ekuilibër.